വിമാനത്താവളങ്ങളിലെ നീണ്ട ക്യൂ മറക്കാം, ചിപ്പ് ഘടിപ്പിച്ച പാസ്‌പോർട്ട് വരുന്നു

യു.എ.ഇയിൽ താമസിക്കുന്ന ഇന്ത്യൻ പ്രവാസികൾക്ക് വിദേശയാത്രകൾ ഇനി കൂടുതൽ വേഗത്തിലും സുരക്ഷിതവുമാക്കാം. ഇന്ത്യയുടെ പുതിയ ചിപ്പ് അധിഷ്ഠിത ഇ-പാസ്‌പോർട്ടുകളിലേക്ക് മാറാൻ പ്രവാസികൾക്ക് നിർദ്ദേശം ലഭിച്ചു കഴിഞ്ഞു. 2025 ഒക്ടോബർ മുതൽ നിലവിൽ വന്ന ഈ പുതിയ സംവിധാനം യാത്രക്കാർക്ക് വലിയ ആശ്വാസമാണ് പകരുന്നത്.

ഇന്ത്യയുടെ പാസ്‌പോർട്ട് സേവനങ്ങളെ ആധുനികവൽക്കരിക്കുന്നതിനായുള്ള പാസ്‌പോർട്ട് സേവാ പ്രോഗ്രാം എന്ന പദ്ധതിയുടെ ഭാഗമായാണ് ഈ പരിഷ്കാരം നടപ്പിലാക്കുന്നത്. ഡിജിറ്റൽ സാങ്കേതികവിദ്യയും മെച്ചപ്പെടുത്തിയ സുരക്ഷാ സംവിധാനങ്ങളും ഉപയോഗിക്കുന്നതിലൂടെ പാസ്‌പോർട്ട് സേവനങ്ങൾ കൂടുതൽ കാര്യക്ഷമമാക്കുകയാണ് ഇതിലൂടെ ലക്ഷ്യമിടുന്നത്.കൂടുതൽ വിവരങ്ങൾക്കും അപേക്ഷകൾക്കുമായി ഇന്ത്യൻ എംബസിയുടെ ഔദ്യോഗിക വെബ്സൈറ്റ് അല്ലെങ്കിൽ ദുബായിലെ കോൺസുലേറ്റ് ജനറൽ ഓഫ് ഇന്ത്യയുടെ സൈറ്റ് സന്ദർശിക്കാവുന്നതാണ്. കൂടാതെ, യുഎഇയിലെ അംഗീകൃത BLS ഇന്റർനാഷണൽ സെന്ററുകൾ വഴി പാസ്‌പോർട്ട് സേവനങ്ങൾ ലഭ്യമാണ്.

ഇ പാസ്പോർട്

സാധാരണ പാസ്‌പോർട്ടിൽ നിന്ന് വ്യത്യസ്തമായി, ഇതിന്റെ കവറിൽ ഒരു RFID (റേഡിയോ ഫ്രീക്വൻസി ഐഡന്റിഫിക്കേഷൻ) ചിപ്പ് ഉണ്ടായിരിക്കും. നിങ്ങളുടെ ഫോട്ടോ, വിരലടയാളം തുടങ്ങിയ വിവരങ്ങൾ ഇതിൽ ഡിജിറ്റലായി സൂക്ഷിച്ചിട്ടുണ്ടാകും. പാസ്‌പോർട്ട് കവറിലെ ചെറിയ സ്വർണ്ണ നിറത്തിലുള്ള ചിഹ്നം നോക്കി ഇത് തിരിച്ചറിയാം.

വിമാനത്താവളങ്ങളിലെ നീണ്ട ക്യൂ ഇനി മറക്കാം. സാധാരണ 25 മിനിറ്റ് എടുക്കുന്ന ഇമിഗ്രേഷൻ നടപടികൾ സ്മാർട്ട് ഗേറ്റുകൾ വഴി വെറും 5 മിനിറ്റിനുള്ളിൽ പൂർത്തിയാക്കാം. യുഎഇയിലെ വിമാനത്താവളങ്ങളിലും സിംഗപ്പൂർ, ഓസ്‌ട്രേലിയ തുടങ്ങിയ രാജ്യങ്ങളിലും സാധാരണ പരിശോധനകളില്ലാതെ തന്നെ 'ഓട്ടോമേറ്റഡ്' സംവിധാനം വഴി അതിവേഗം കടന്നുപോകാം. പാസ്‌പോർട്ടിലെ വിവരങ്ങൾ ഡിജിറ്റലായി എൻക്രിപ്റ്റ് ചെയ്തിരിക്കുന്നതിനാൽ തട്ടിപ്പുകൾ തടയാൻ സാധിക്കും.

എങ്ങനെ അപേക്ഷിക്കാം?

യു.എ.ഇയിലുള്ള പ്രവാസികൾക്ക് താഴെ പറയുന്ന കേന്ദ്രങ്ങൾ വഴി പുതിയ ഇ-പാസ്‌പോർട്ടിന് അപേക്ഷിക്കാം:

1.അബുദാബിയിലെ ഇന്ത്യൻ എംബസി

2. ദുബായിലെ കോൺസുലേറ്റ് ജനറൽ ഓഫ് ഇന്ത്യ

3. യു.എ.ഇയിലുടനീളമുള്ള അംഗീകൃത BLS ഇന്റർനാഷണൽ സെന്ററുകൾ

സ്ഥിരമായി യാത്ര ചെയ്യുന്നവർക്കും സമയം ലാഭിക്കാൻ ആഗ്രഹിക്കുന്നവർക്കും ഈ പുതിയ ഹൈടെക് പാസ്‌പോർട്ട് വലിയൊരു മുതൽക്കൂട്ടാണ്.

Content Highlights: Chip-enabled passports are coming to India; soon you can cross borders without standing in long queues.